港交所（00388）再有人事變動，被喻為上市科「明日之星」，有可能成為狄勤思接班人嘅陳翊庭（Bonnie Chan），將會於本月二十七日離任，港交所行政總裁李小加再失一員猛將！
港交所尋日公布，簡愛嫦（Grace Kan）將接替陳翊庭，出任上市科首次公開招股交易部主管。數數手指，自從李小加上任後，港交所陸續有部門主管辭職或退休，包括前財務總監詹德慈、資訊技術科主管黃國權、前法律服務部主管高美萊、前行政管理部主管周樂森及前執行總監郭利沛等，多名猛將離任，李小加都咪話唔頭痕！
講番Bonnie，佢喺○七年四月加入港交所上市科之前，於大型投行做律師，傳聞今次佢另有高就，重操故業做番律師，去律師行做合夥人。Bonnie加入港交所上市科以來，仕途看漲，市傳佢有機會做上市科主管狄勤思嘅接班人。
接替Bonnie嘅係Grace，喺上市科多年，九六年十月加盟上市科後，歷任企業融資、監察及首次公開招股交易等部門要職，佢本身係澳洲特許會計師公會嘅會士（Associate member），曾經喺多家會計師行工作，包括當時嘅安達信會計師事務所（香港）以及喺澳洲嘅羅兵咸會計師事務所。
余絲韻