恒生管理學院商學院院長蘇偉文亦質疑政府「船頭驚鬼船尾驚賊」，打擊炒樓未敢落重藥，因為打擊炒樓最重要是增加單位供應，但政府加推的三幅土地，合供提供單位僅五百多個，即每幅地皮只提供一百多個中小型單位，可見政府不敢推出大批土地，「政府驚住推冧個市，會有大批業主反對政府，所以咪唔夠膽做嘢。」
蘇偉文又指曾俊華提出限制樓花摸貨等措施，亦只會對師奶兵團有影響，對大鱷完全搔不着癢處，「啲樓價如果係咁升，有錢賺大鱷一定出擊。」
立法會議員李永達炮轟政府措施雷聲大雨點小，質疑措施用處不大，更對曾俊華只加推三幢可提供五百多個單位的蚊型地皮，感到震驚，「政府係唔係冇地冇成咁，三幅地只有五百個單位，講出嚟都失禮人啦，根本係杯水車薪，房署起一幢公屋都七百幾個單位啦！」
自由黨常委田北辰亦指五百多個單位太少，認為政府應同時限制有關中小型單位的發水比率，避免不必要設施，如豪華會所等，令有關單位成為真正上車盤。