○八年雷曼事件後，美國政府大印銀紙救市，但經濟未見起色，只見好多曾深陷財困嘅金融機構高管即時加薪自肥，搞到奧巴馬政府發晒火。為避風頭，近排上市公司掌舵人亦好識做，自行調低薪酬，薪酬調查公司Equilar嘅調查指出，減薪幅度最大嘅舵手「三甲」都係華爾街大行「揸Fit人」，或者係因為今年大選，唔想破壞金融界嘅形象。
成為全國「減薪之王」嘅係曾自詡「做神嘅工作」嘅銀行家——高盛行政總裁布蘭克費恩，去年總薪酬較○八年勁減4,010萬美元（約3.12億港元），緊隨其後嘅係花旗集團CEO潘迪特及摩通舵手戴蒙。Equilar調查咗美國一百大上市企業舵手去年總薪酬（以收入計），調查範疇包括各舵手期內固定薪金、現金花紅、股票、認股權及其他津貼等，結果發現布蘭克費恩去年固定薪酬雖仍有60萬美元，但去年嘅花紅卻只有26.26萬美元，總薪酬較○八年大減4,010萬美元，「減薪之王」可謂當之無愧。
喺減薪排名榜上排第二及第三位嘅潘迪特及戴蒙，去年總薪酬分別只有12.87萬及126.5萬美元，減幅高達3,810萬及3,450萬美元。最近受到性醜聞困擾而「黯然下台」、排名第十嘅惠普CEO赫德，去年就減薪980萬美元。
余絲韻