之前嘅iPhone面世即風靡全球，即使依家出到嘅iPhone 4有明顯瑕疵，都仲有好多人趨之若鶩，而蘋果公司創辦人喬布斯次次都會為咗自己公司嘅呢啲新產品親自出嚟介紹一番。恒生銀行尋日推出外匯孖展iPhone應用程式新服務，CEO梁高美懿就化身為「女版喬布斯」，親自出場為大家介紹一下呢項服務。
為咗迎合咁潮嘅服務，梁太上台時就揸住部iPad應吓景，佢一開聲就話畀台下嘅人聽，話部iPad係真嘅，冇花冇假，不過佢亦都好老實話自己其實唔識用，要同事幫佢入啲應用程式。
跟住佢就講吓恒生幾咁與時並進，話早喺○○年時已經推出個人網上銀行服務，至今用戶人數已突破100萬，依家超過一半嘅交易及查詢都係經網上銀行進行，而由○七年起就推出手機交易服務。
恒生向來非常注重環保，所以梁太亦趁機介紹使用電子服務，話有助減少碳排放，減少用紙，好似佢哋嘅客戶使用電子帳單及電子投資通知書，大概每年就可以慳番1,000萬頁紙張，而佢自己尋日用咗iPad就可以慳番一張紙。為咗救救地球，大家都不妨用多啲電子服務喇！
余絲韻