市場熱線：旺旺伺機低吸

本地魚缸受拖累，低開後早段仍頂得兩下頭槌，但下半場在祖國魚缸跌幅擴大下，本地魚缸好似食咗瀉藥一樣，兩指數散場插水至接近全日低位。恒指收報21,473點，跌327點或1.5%，國指失守萬二關，收報11,943點，跌282點或2.3%。

昨日藍色大隻佬大部分仆直，只有QQ（00700）、太古A（00019）跟中電（00002）逆市上升，富士康（02038）則跌4.8%收報5.85元，跑第尾。周一係威係勢的祖國移動（00941），昨日跌2%，係拖冧魚缸的主要兇手。

祖國出口數字唔多好睇，本地魚缸的出口股跟港口股表現同樣差強人意，思捷（00330）跌1.7%，另一重磅出口股利豐（00494），建議私有化利和經銷（02387），雙雙高掛免戰牌。招商局（00144）跟「貓貓狗狗」（01199）分別跌1.7%及2%，其他港口股同樣腳軟。

回補裂口有利後市

祖國銀監會取消錢莊7項服務收費，斷咗紅色錢莊一條財路，紅色錢莊冚包散。民生錢莊（01988）昨日派成績表，股價表現相對硬淨，跌1.1%，其他紅色錢莊跌幅由0.8%至3%不等，建行（00939）跌3%，在眾大隻佬中排行尾二。其他大隻佬表現乏善可陳，但以近兩星期魚缸累計升幅逾千點，昨日回吐好正常，若然回補埋21,200點附近的上升裂口，對後市勇闖高位更有利。

較早前報道指，中國旺旺（00151）的招牌產品旺旺仙貝被驗出大腸桿菌未達檢測標準，股價一度低見5.81元。不過，集團已就有關報道澄清，指除了濰坊一家工廠其中一款產品不合格，該廠其他產品以至其他工廠均符合要求。旺旺股價呢幾日亦拾級而上，已重回6元之上，昨日更逆市上升1.3%，收報6.09元。

單一事件影響有限

古勝相信今次濰坊廠出事，純屬個別事件，有別於當年蒙牛（02319）「毒奶」問題，以及較早前霸王（01338）洗髮水被驗出含致癌物質有所不同。況且，現時米果僅佔集團總營業額約27%，除非集團的其他產品，包括乳品及飲料，佔總營業額約47%，以及休閒食品如糖果、冰品及果凍，佔總營業額25%亦出現問題，否則影響相當有限。反而旺旺股價回落至6元水平，提供一個上車機會，隨着祖國市場內需繼續擴大，旺旺前景仍值得睇高一線。

戰報

新海能源（00342）+15%

帥哥上周五指新海能源有勢創新高，當日低位1.36元，昨日逆市創1.57元新高，累升15%。

中金資源（08071）+13%

高仁周一指中國金屬資源部署轉型，昨逆市呈強，高見0.178元，較推介當日低位0.157升13%。

古勝