筆者喺好多年前，曾經喺郭生旗下嘅新意網（08008）做過，主要負責業務拓展同「搞三搞四」。
筆者當時已經認識帶領新意網嘅許浩明，佢係一個風趣、幽默嘅管理層，仲記得當時佢着嗰套粉紅色Golf型格戰衣喺公司行來行去，實在只能講一句「型到爆燈」。如果無番咁上下功力，都唔係咁容易carry得起。
再見番佢，已經係喺香港資源（02882）嘅全年業績公布會上，原來佢已經過檔成為佢哋其中一位重要管理層。
許生最強嘅，唔使講梗係佢最勁揪嘅M&A同埋投資者關係啦！
望一望香港資源，同○九年比較，今年佢哋嘅毛利增加咗527倍，最主要梗係因為佢收購咗金至尊業務，成為咗佢哋新嘅動力來源。
「祖國愛黃金，揸金最有心」就係人都知啦，有質量保證同埋企業價值鏈（value chain）嘅全方位優勢，成為不少企業維持佢哋喺21世紀嘅優勢立腳點，香港資源嚟緊梗係要不斷擴大佢哋嘅版圖，咁樣先至可以立於一個不敗之地。如果咁睇，許生又要有排辛苦，冇得瀟灑。
香港大學電子金融服務榮譽助理教授 徐燦傑