絲絲講場：CIMA商戰港大生突圍
香港面對區內市場嘅競爭愈來愈大，莘莘學子未畢業就要做定好多準備，所以好多相關嘅比賽都受到就嚟加入「社會大學」嘅學生歡迎。最近英國特許管理會計師公會（CIMA）舉辦嘅「商業精英國際挑戰賽」，香港區決賽冠軍就由香港大學嘅同學奪得。
代表參戰全球決賽
攞獎嘅港大4名學生，組成名為「星光」（Starlight）嘅隊伍參加呢次挑戰賽，比賽題目係有關流動電話網絡供應商分析研究，佢哋最終喺超過150隊中脫穎而出。CIMA香港分會副會長Richard Kenworthy話比賽競爭好激烈，超過150隊參賽隊伍中，最後入圍嘅4隊需向專業評審團發表報告。評審們一致對港大學生出色嘅分析能力及表達技巧作出高度評價。
星光隊將代表香港喺下月參加馬來西亞舉行嘅全球總決賽，與來自英國、愛爾蘭、斯里蘭卡、印度、中國大陸、菲律賓、馬來西亞、巴基斯坦、新加坡、南非、阿拉伯聯合酋長國及澳洲嘅隊伍爭奪全球總冠軍。
余絲韻