冇幾耐之前，絲絲有朋友見到曾被喻為「公職王」嘅中信泰富（00267）前董事總經理范鴻齡（Henry），由去年因公司炒燶外匯而辭晒所有職務至今都成年幾，佢一直深居簡出，絲絲時不時搵佢，佢都唔喺香港，有時去咗旅行，有時就出Trip，佢亦都好少喺公開場合露面。
早前Henry竟然出席咗一個招商活動，究竟有乜搞作？佢當時派嘅卡片係寫住范氏慈善信託基金主席，原來佢家陣全情投入搞緊慈善。Henry同絲絲講，佢哋嘅慈善基金有好多搞作，但以教育為主，遲啲佢仲要發大嚟搞添，至於詳細情形就先賣個關子，到時再話畀絲絲知喎。
絲絲有啲疑惑，Henry與中信泰富前主席榮智健情同手足，可以話係共同進退，大家離開中信泰富嘅日子都差唔多，平時兩人出雙入對，連傾偈都用上海話，家陣榮太子另起爐灶，連佢喺中信泰富嘅前秘書都過埋檔幫手，佢冇理由冇份參與。點不知Henry話，佢真係冇去到榮太子間新公司幫手，佢依家只係一心一意想搞好個家族慈善基金。可能經歷過好多大起大落事件，Henry已經洗盡鉛華，返璞歸真想做啲幫到人又令自己快樂嘅事。
余絲韻