絲絲講場：金貿場張德熙大熱掌帥
金銀業貿易場尋日選舉新一屆理監事會，一如所料，張德熙以大熱門姿態高票當選新理事長，可謂眾望所歸，兩名副理事長就分別由平和金銀嘅陳尚智及周大福珠寶金行嘅鄭錦標出任。尋日選舉過程都算熱鬧，共收到116張選票，廢票只有3張。今年適逢金貿場一百周年，新人事新作風，會有乜嘢搞作？
承先啟後改革發展
張德熙話香港係世界三大黃金市場之一，金貿場作為全球唯一擁有100年歷史嘅黃金交易所，將會以「承先啟後，改革發展」作未來發展方向。金貿場改革之路仍然漫長，但尋日就率先換上印有百周年新標誌嘅新卡片派畀大家。
金貿場近年已不斷變革，前任理事長李德麟過去4年為金貿場開創唔少先河，例如成功開拓電子交易平台、新增倫敦金交易合約及開設倫敦金交易登記服務等，最重要係令金貿場轉虧為盈，又開始研究納入政府監管。
余絲韻