中國女富豪愈來愈多，大多數係白手興家，尋日《福布斯》公布一項白手興家全球女富豪榜，龍湖地產（00960）董事長吳亞軍以39億美元身家榮登榜首。
吳亞軍有重慶女首富之稱，今年三月佢喺全球富豪榜排第232位，已榮升中國女首富。絲絲記得龍湖喺去年十一月在港上市，吳亞軍嘅身家一夜間由120億元人民幣暴漲至273億元人民幣，不過佢就好低調。
除咗吳亞軍之外，另有3位中國女富豪榜嘅常客今次亦榜上有名，分別係華寶國際（00336）董事長朱林瑤（21億美元身家）、SOHO中國（00410）行政總裁張欣（20億美元身家）及玖龍紙業（02689）董事長張茵（17億美元身家）。有咁多中國女富豪上榜，福布斯解釋話主因係中國經濟起飛，造就唔少發達機會，令到佢哋嘅身家愈嚟愈豐厚。
話明係全球富豪，又點少得其他國家？好似美國品牌GAP創辦人嘅老婆Doris Fisher、創辦Zara時裝嘅羅撒麗亞‧麥拉（Rosalia Mera）以及英國著名小說作家羅琳亦都入圍。最有趣係原來喺14位女人之中，只有2%係真正單打獨鬥，自己創業起家，有一半係與老公或家人一齊創業，先做到今日咁成功。
余絲韻