平保（02318）剛啱完成接收新橋轉讓嘅一批深圳發展銀行股份，雖然深發展向平保再增發新股就仲未完成，不過平保已經急不及待開展整合工作。據稱平安銀行行長Richard Jackson已經辭咗職，轉投深發展出任特別顧問，佢喺平安銀行嘅空缺會由副行長葉望春擔任。
依家深發展嘅行長Frank Newman都已經年過六十，好快就要退休，Jackson過定去做特別顧問，為做下一任行長而準備都好合理，始終平安銀行同埋深發展呢兩家銀行遲早都要整合，不過Jackson咁快過檔就令人覺得幾驚奇。
Jackson曾經喺花旗做咗成20年，○五年加盟平保出任首席金融業務執行官，喺平保擴展綜合金融服務嘅策略下，Jackson負責銀行方面嘅經營，隨着平保入股深發展嘅好事近，Jackson發揮嘅空間會愈來愈大。
余絲韻