「人鼠齊暢泳」、「迴轉老鼠」唔單止係香港問題，查實內地農村嘅鼠患指數都非同小可，不過好彩阿爺出手推動內銷，一個「家電下鄉」順手救番班農民出「鼠海」。絲絲冇講錯，唔係出手捕鼠，而係農民利用補貼買家電「防鼠」。
彭博有報道話，原來之前啲農民冇錢買電冰箱，老鼠通屋走兼日日食霸王餐；依家有優惠補貼幫補下，冰箱售價平咗13%，農民即刻入貨自救，所以有數據顯示，冰箱成為去年補貼買得最多嘅家電，銷售額仲高達320億元（人民幣‧下同）。
家電製造商計落最着數，以今年首4個月為例，農民已用補貼買咗417億元嘅家電，足足比去年同期大增510%，其中海爾集團（01169）係四月份最暢銷品牌。梗係啦，絲絲知道海爾非常有生意頭腦，知道農村鼠患猖獗，平常一台冰箱只會成為養鼠嘅安樂窩，引鼠寄居寒舍，所以海爾亞太區總裁Philip Carmichael話明要針對問題，設計一台有金屬後蓋板、配上更粗「防啃」電線嘅防鼠冰箱，謝絕不速之客繼續造訪咁話，農民聽到自然排隊上門幫襯啦。
余絲韻