絲絲講場：任志剛又有Job講人仔走勢
金管局新舊總裁做事作風真係有天壤之別，新嗰位就成日唔知潛咗去邊，好日都唔曝光，但係舊嗰位嘅人氣依然好勁，經常喺媒體見到佢嘅蹤影，唔知嘅話仲以為佢仍然係金管局總裁添。
任志剛尋日先至係佢嗰blog講吓自己近況，佢話好耐冇同大家溝通，因為佢自從四月喺中大全球經濟及金融研究所嘅工作開展後，就忙於協助研究所將未來幾年嘅研究議題定落嚟，同時又要特別留意近期國際金融令人擔心嘅發展，所以就唔得閒「招呼」大家。
應邀赴獅城講Talk
聽聞佢將會應美銀美林嘅邀請，出席下周三喺獅城舉行嘅會議，到時佢會就人民幣未來走勢作演講，所以真係幾唔得閒。
搵任志剛講人民幣走勢最適合不過，佢以前係金管局總裁，依家係中國金融學會執行副會長，兼且做埋中大全球經濟及金融研究所傑出研究員，相信佢對人民幣自然有一番獨到嘅見解，可以畀大家參詳一下。
余絲韻