絲絲講場：內地獨董人工差天共地
獨立董事一向被視為「筍工」，出席幾次會議就可以攞到報酬。內地傳媒幫上市公司「大盤點」，發現銀行出手闊綽，請到嘅獨董可謂粒粒巨星，不過做獨董但僅講名氣，更加講Heart，有啲公司仔一毫子都唔畀獨董，但有啲獨董就算年事已高仍準時出席會議，仲畀好多建議。
據《證券日報》嘅盤點，錢莊出手最闊佬，○九年年薪最高獨董係深發展嘅米高奧漢侖，佢賺咗130萬元（人民幣‧下同），比起延華智能嘅武舸（1,800元）多722倍；民行（01988）、中行（03988）、工行（01398）等嘅獨董人工有35萬元以上，民行嘅王聯章就有112萬元排第二，深發展嘅陳武朝、謝國忠亦分別有98萬及80萬元。
開會需質量兼備
有人重金聘請知名人士，亦有公司以「攞咗人工，同員工冇分別，講嘢冇分量」為理由而冇支薪畀獨董，不過呢啲無薪獨董亦好敬業，例如斯米克嘅徐治懷已82歲，8次會議親身出席咗7次，另一次係視像會議。除咗「量」之外，「質」都好緊要，有啲獨董雖然次次會議都現身，但從來對公司提出嘅發展或決議都冇任何異議，究竟佢哋係白
人工，抑或呢啲公司真係無懈可擊？
余絲韻