全球一體化令貿易變得無遠弗屆，絲絲發覺依家潮流興將有共同特點嘅國家，集合為一個體系咁去講，最出名嘅當然係「金磚四國」（BRIC），之後就開始「動物化」，例如有債務纏身嘅「歐豬五國」（PIIGS），依家連滙控（00005）行政總裁紀勤都加入點名行列，整咗個「靈貓六國」（CIVETS）出嚟。
紀勤借用「靈貓六國」與「靈貓六覺」（Cat’s sixth sense）嘅諧音，巧用咗貓嘅第六感（較人類嘅五觀多一感）嚟形容新興市場六國嘅新勢力，CIVETS呢個字係用紀勤睇好嘅6個國家英文字首砌埋，佢哋依次係哥倫比亞（Colombia）、印尼（Indonesia）、越南（Vietnam）、埃及（Egypt）、土耳其（Turkey）同埋南非（South Africa）。紀勤話呢批國家有大量年輕人，經濟多元化，加上政治環境穩定，肯定好有前途。
其實Civets係屬於靈貓類動物，又叫做麝貓，與上述幾個國家多元化經濟能力嘅特色好相襯，據了解，麝貓係雜食性動物，上至和牛下至腐肉佢都啱，而且係瀕危性動物，配合晒買少見少嘅新興市場。紀勤創立咗呢個新字，如果一旦言中，CIVETS肯定成為國際投資者必爭之地，再凸顯紀大班嘅先見之明。
余絲韻