中策（00235）與中信金合作收購南山人壽呢單嘢本身已好複雜，台灣嘅監管機構仲用緊放大鏡研究，最近台灣嘅《財訊雙週刊》爆料，話曾經出任中信資源（01205）主席嘅郭炎透過旗下公司同星實業，會成為中信金嘅大股東，或令中策與中信金合作收購南山添突變。
中信金上月底發表公告，擬以每股十六點七九元（新台幣‧下同）發行二十五億股，佔擴大後股本嘅兩成一，籌資逾四百一十九億元。據講郭炎有意斥資二百一十億元認購約相等於中信金百分之九點九股權嘅新股，美國前總統喬治布殊幕僚Ed Rogers所代表嘅私募基金亦認購百分之八點五。目前中信金最大股東辜家僅持股百分之八點六，配股後再攤薄至百分之六點九。
中策與中信金已有共識，若成功收購南山人壽，中信金會揸三成股權，然而郭炎與內地中信系嘅王軍關係密切，市場好關注中策跟中信金合作收購南山人壽嘅事會否受影響。
香港嘅投資界對郭炎並唔陌生，佢喺香港出生，畢業於台灣大學商學系，喺本港銀行界打滾多年，有豐富嘅人脈網絡。郭炎於九七年出任中信嘉華銀行主席兼行政總裁，據講就係由王軍力邀。
余絲韻