社交網站Facebook盛傳上市之際，其正式登陸內地嘅消息亦愈傳愈盛，正當唔少人認定由於李嘉誠係Facebook嘅其中一個投資者，TOM集團（02383）將成為Facebook入華嘅合作夥伴之際，內地近日又盛傳內地搜尋器一哥百度（Baidu）將與Facebook喺中國成立合營，Facebook要北望神州，似乎唔係只得個想字咁簡單！
自Google改變中國策略，令部分人質疑外國網站要打入中國市場會難上加難，事實上，微軟旗下嘅MSN與新聞集團旗下嘅Myspace早就進入內地多年。內地有傳Facebook未來進軍中國亦會採取類似MSN或Myspace嘅合營模式，而百度喺內地搜尋器市場嘅領導地位，更成為Facebook願意尋求合作嘅主要原因，但呢個消息至今仍無法獲任何人證實。
至於另一個說法，當然就係Facebook與TOM成立合營，雖然呢個消息亦係無法證實，但如果心水清，大家可能會有印象，李嘉誠亦有投資嘅Skype過去就係透過與TOM成立合營而打進內地，而Facebook再以相同模式打入內地，亦似乎係順理成章！
余絲韻