7隻內銀股中只剩低中信行（00998）仲未公布業績，一眾內銀「賓卡」薪酬自然成為亮眼點，當中以民行（01988）董事長董文標最好搵，○九年搵咗654萬人仔，比起其他同行搵多好多！
國企銀行為國家服務，「賓卡」人工可以想像到唔會特別高，中行（03988）董事長肖鋼、工行（01398）董事長姜建清及建行（00939）董事長郭樹清，○九年總薪酬都唔超過100萬元人民幣，相反屬於民營企業嘅民行就冇呢個掣肘，雖然上市冇耐，但董文標人工都咁高，的確令人羨慕！
不過做「賓卡」睇慣錢，可能對於人工唔會好在意。好似工行啱啱宣布嘅人士變動，由外資行德意志銀行轉去做工行副行長嘅張紅力咁，絲絲就估佢一定係對銀行界好有遠見及抱負喇！今年45歲嘅佢之前一直喺外資行打工，後來專睇中國業務。
其實工行副行長一職之前已傳過係由張紅力出任，依家工行正式委任，只要等埋中銀監批准，佢就可正式上任。
余絲韻