今年最矚目新股之一嘅英國保誠，來港上市計劃正籌備得如火如荼，市場傳聞話保誠喺本周四會進行港交所（00388）上市聆訊，不過據接近監管機構嘅消息話，為咗要有多啲時間審閱保誠嘅上市申請，上市委員會將會「加班」，提早喺本周三開始就保誠進行上市聆訊。
睇番以往嘅「超大型」新股，上市委員會「加班」或提早作初步審閱上市申請時有聽聞，所以絲絲都唔感到意外。
保誠未「買起」AIA（友邦保險）之前，AIA諗住來港上市，集資額更有機會打破紀錄，港交所諗住省靚招牌，點知後來殺出「程咬金」，好彩保誠為咗可以順利完成供股，決定先來港上市後始進行供股集資收購AIA。呢間巨型保險企業「兜個圈」始終都來港上市，港交所「嚴陣以待」，上市委員會「加班」睇實啲都好正常。
事實上，保誠Size超巨型，文件多不在話下，上市時間又緊迫，因為喺下周四（本月二十九日）英國開市，就要公布供股嘅細節，所以香港上市時間亦要好好把握，依家計劃係如果本周嘅上市聆訊順利「過關」，會喺五月四日或五日上市。
保誠集團行政總裁蒂亞姆早前接受《英國電訊報》訪問時話，已獲得本港監管機構批准合併，不過保監發言人尋日就澄清，正審核保誠及友邦嘅申請，工作仍在進行，未有時間表。
余絲韻