絲絲講場：雷曼苦主撞破銀公轉場

銀行公會例會隔周五喺中環太子大廈舉行，依家不但傳媒守候見主席洪丕正（阿Ben），連一班雷曼ELN苦主都話要等埋一份，搞到成班「賓卡」尋日要轉移陣地去阿Ben地頭嘅渣打總行開會，認真狼狽，仲要事有湊巧畀班苦主撞破！

話說呢班苦主亦好識窿路，佢哋知道渣打嗰邊有水機，有苦主喺太子大廈等到攰，過去飲杯水歇歇腳時，赫然發現一班疑似記者集結喺渣打大堂，才得知原本應該喺太子大廈開會嘅「賓卡」已經「逃之夭夭」轉咗場！於是一行近30名苦主亦帶齊橫額到渣打大堂嗌口號，又話要阿Ben落嚟見佢哋！

呢班苦主情緒雖然唔係好激動，不過阿Ben與其他「賓卡」當然唔會直接同佢哋硬碰硬，結果成個局面僵持咗好耐。絲絲同其他記者朋友呆站咗個幾鐘頭先去到採訪阿Ben，佢都即刻「Sa晒冧」，猛話唔好意思，其實大家都明白佢嘅苦處，不過絲絲就擔心呢班苦主日後會重施故技，睇嚟銀公嘅「賓卡」真係要諗諗計。

余絲韻