銷售人員加得唔錯
獅子銀行嘅高層一早預告咗今年加薪幅度係低單位數字，所以員工應該心裏有數，奇就奇在有啲員工嘅評級都唔係差到落入第4及第5級，但一樣冇人工加，所以如果有1%至2%加幅已經好值得慶幸。
不過，絲絲聽聞獅子銀行嘅銷售人員好似客戶經理咁，部分人嘅人工就加得唔錯，由幾個巴仙至10%不等。有啲只係加入公司幾個月，一樣有幾好嘅加幅。冇辦法啦，金融海嘯後經濟逐步好轉，銀行界由去年下半年開始又再請番人，尤其係前線銷售人員，間間銀行都話要請幾百人，加上一啲中資銀行在港大事擴張網絡，自然又形成一股挖角潮。如果佢哋唔將銷售人員嘅人工加到咁上下，恐怕都好難留到人才。
余絲韻