股神巴菲特氣定神閒講投資理念就睇得多，Rock味十足嘅股神你見過未？咁少見嘅形象即刻熱爆網絡，個個爭住睇佢點樣模仿八十年代紅極一時嘅搖滾樂隊Gun N’Roses歌手Axl Rose。
呢段視頻係巴菲特為巴郡旗下嘅汽車保險公司Geico拍攝嘅年會短片，股神都好認真搞好個造型，真係維妙維肖，戴咗一頂長及腰部嘅假髮，加埋紫色印花頭巾，身穿黑色皮Jacket；咁都未夠，佢仲着埋紅色蘇格蘭格仔裙，當佢高舉手臂，亮出密密麻麻嘅紋身深情獻唱，觀眾有乜辦法唔<img src='/font/fab4_5nbk.gif' border='0'/>嘩鬼叫？
睇過段片嘅老友話，呢段片只有2分24秒，開頭有好多「演員」，全部係Geico公司嘅員工，有員工自彈自唱公司之歌，仲有人打扮成公司嘅吉祥物，巴菲特喺最後30秒出場，表現完全蓋過其他人嘅風采，博得全場歡呼。
Geico每年二月都會喺年度員工會議前拍攝短片，過去4年巴菲特都有出鏡，曾扮演過DJ及流浪漢等不同造型。公司創意媒體服務總監今年想巴菲特嘅表演更有Gimmick，股神就講笑話：「我一直搵唔到肯將我包裝成歌星嘅經理人公司。」
余絲韻