新人事新作風，港交所（00388）新任行政總裁李小加上場後，日前發表嘅最新年報與往日有冇唔同呢？單係睇封面，就睇得出仍然係前任行政總裁周文耀嘅延續。
話說港交所由○八年度開始，周文耀已選用唐代畫家韓滉嘅「五牛圖」做年報封面，因為牛代表沉厚穩重、堅韌不拔，港交所喺推動香港金融發展方面亦以牛嘅可貴特質做典範。呢幅「五牛圖」依家放喺北京故宮博物院，可見來頭不小。
最新發表嘅○九年度年報亦係用「五牛圖」嘅其中一隻牛代表做封面，聽聞周文耀喺今年一月中退休前，已為○九年年報選定封面。咁做一啲都唔出奇，始終係記載○九年嘅大事，○九年仍屬於周文耀主政嘅年代，年報係代表公司，自然要跟到足。
講開港交所年報嘅封面，除咗○八及○九年連續兩年採用「五牛圖」外，由○五至○七年度，周文耀選取咗不同嘅貴重「珍寶」做封面，原來亦有故事。話說佢喺○三年重返港交所時要進行整固，強調要優質市場，咁樣至恒常不變，所以就採用「珍寶」做封面，代表無價要珍而重之。
雖然喺「五牛圖」中，港交所年報封面暫時只選用咗兩隻牛，但李小加今年一月正式接掌後，唔知明年港交所年報封面會唔會有新嘅主題呢？
余絲韻