絲絲講場：宏利訪安老院打成一片
施比受更有福，所以宏利人壽嘅員工經常都會參與大大小小嘅義工服務，喺農曆新年前，宏利（00945）行政副總裁兼香港區首席行政總監何達德（Michael）仲帶咗成班義工探訪老人院，與一班老人家玩得好開心呢！
何達德齊學「醒目操」
宏利義工今次係去耆康會轄下嘅安老院做探訪，當一班公公婆婆見到一個外國人親自落嚟同佢哋玩，雖然起初大家可能會係雞同鴨講，不過Michael一向以熱情見稱，所以大家好快已經打成一片。
除咗玩集體遊戲外，佢仲同成班老人家一齊跟物理治療師學「醒目操」，操練吓啲筋骨，個個都笑逐顏開，佢哋操起上嚟仲好靈活兼有板有眼。
Michael帶領廿幾名宏利義工去老人院，當然唔會淨係探訪咁簡單啦，仲精心挑選啲老人家適用嘅護理設備送畀佢哋，包括助立器、輪椅及助便椅。
余絲韻