扎根港澳25年搞抽獎

活動全名為「中國人壽紮根港澳25年真情回饋─NBA觀賞之旅」，喺買咗佢哋保單嘅客戶中抽出得獎者，前兩日仲抽埋第三階段嘅幸運兒，呢次中獎者共有3位，其中一位可帶多一個親友一齊去。

中國長人姚明依家効力火箭隊，可惜佢仍受腳傷困擾，相信有排都未可以復出，所以今次呢個觀賞團都唔會睇到姚明喺球場上嘅英姿。

盡量安排與姚明見面

不過姚明係全線國壽產品嘅代言人，絲絲聽講有關方面都希望盡量安排，或者請佢嚟同大家食餐便飯，但姚明仲喺養傷階段，係咪可以成事就要下回分解。今次觀賞團會由國壽（海外）方面帶隊。

依家國壽（海外）嘅產品透過銀保喺唔少銀行都可以買到，所以有關方面抽獎嗰陣，亦主觀地希望起碼喺每間銀行買嘅客戶都抽到一個中獎，奈何抽獎呢家嘢都係講運數，而且喺唔同銀行賣出產品嘅數目又唔同，所以最終有間賣佢哋產品賣得特別好嘅銀行有客戶成功再次中獎。

余絲韻