港股彈一彈又再散過，禮拜三傳匯金入市增持三大行，結果遭否認，雖然上證反應唔算好大，但港股就即時玩自殘身體，禮拜三嘅升幅差唔多嘔番晒出來，彈一彈就玩完，睇嚟近排都係難炒格局，唔通要提早收爐等過年？
市場上動作唔多，今年中央講明要谷內需去推動經濟，內需股就算唔大炒都唔會太差，好似隻利邦（00891）咁，本身食正內需概念，上市後走勢相當唔錯，最重要係去年十二月剛起步炒上，未散過貨就遇上跌市，所以股價仲咁「硬淨」。佢主攻內地奢侈品男裝市場，隨住內地富人愈來愈多，市場潛力的確唔可以睇小，過去幾年佢嘅零售價值銷售，達到26%的複式增長，認真唔講得笑，早前跌市股價試過3.2元低位後，已經成功收復番10日線，近日受制於50日線嘅阻力，一旦突破，向上可以試5元，止蝕位不妨定3.3元。
古晨