內地抽緊銀根，引發中港兩地股市下挫，悲觀情緒下，連帶一直異常強勁嘅美股，三日內亦唔見「五舊」，睇嚟短期都幾頭痕，現時投資者最應該做嘅係「停一停，諗一諗」，唔好亂咁衝燈，事關大市咁跌法，炒股都要忍一忍手，如果想買嘢，都應該搵番啲穩陣派嚟買。
內地公路股現時可以講係進可攻時退可守，隻江蘇寧滬高速（00177）值得考慮。內地去年新車突破1,300萬輛，新車多咗，公路使用量點都會提高，公路成本係固定嘅，愈多車用，盈利隨時可以倍增，而寧滬高速息率仲有4厘幾，又可抗通脹，直頭係抗跌市嘅最佳投資，相信班基金改變投資組合時，隨時炒起都唔奇，古晨暫時睇佢值9蚊，屆時息率仲有3厘都好合理，止蝕就定6蚊，防守股止蝕位可以闊少少。
古晨