奧巴馬出毒招限制銀行及投行的營運，尤其係有意禁止金融機構進行投機炒賣活動，令主要靠「揸鑊鏟」維生的銀行及投行股插水，成為花旗魚缸跌市元兇。古勝認為，花旗魚缸上周四及五急跌，擺明係華爾街班大戶刻意向呢個綁手綁腳的政策「示威」。老實講，「阻人搵食猶如殺人全家」，華爾街對奧巴馬欲實施的限制當然恨之入骨，班大戶寧願一拍兩散，亦唔要坐以待斃。

今日恒指能否守在二萬之上，古勝烏卜卜，但可以肯定係，即使祖國暫未進一步緊縮貨幣，本地魚缸亦難見較強勁的反彈，看官要有心理準備，本地魚缸在本周將繼續向下尋底，即使技術反彈，亦只會係大插小彈格局。古勝認為，今日本地魚缸有機會再試上周五20,200點低位，跌穿此關應直指19,800點水平，不過若此關能守穩，在嚴重超賣情況下，恒指有機會再反彈至20,800點至21,000點水平，不過要越過二萬一關阻力極大，博反彈似乎唔多划算。

內需股始終秤先

上周五恒指報價曾出現32分鐘系統癱瘓，當報價系統恢復正常後，指數由20,500點急穿20,300點，一個上半場屠殺19幾億份恒指牛仔，唔排除午後V彈係冚倉盤，冚倉完成，再反彈力度當然有限。不過古勝始終認為，祖國今年要繼續狂谷內需，講到尾都唔想魚缸就咁死落去，所以中資股後市仍可睇高一線，尤其內需股可趁調整吸納。

國藥控股（01099）係祖國最大的藥品及保健用品分銷商及領先的供應鏈服務供應商，擁有全國最大的藥品分銷網絡，龍頭地位係藥股首選。

龍頭地位享溢價

祖國醫療改革及人口老化問題，將令內地對醫療保健產品的需求持續上升，國藥將會直接受惠。加上國藥的醫院藥品銷售額及購併步伐均較市場預期好，今年若成功購併，料可帶來更大幅度的盈利增長。雖然國藥登陸本地魚缸以來，股價已累積巨大升幅，現價市盈率似乎又幾高，但行業具備優勢，加上其行業龍頭地位，呈溢價亦屬合理。

古勝