本文重點
近年有唔少內地體育品牌想「走出去」，踏上國際舞台，好似李寧（02331）喺美國開設商店及設計中心，安踏（02020）就贊助中國國家運動隊，有機會喺奧運會上睇到中國國家運動隊穿上安踏品牌。另一間體育用品特步（01368）亦走向國際舞台，佢哋成為英超球隊伯明翰贊助商，係首個贊助英超聯嘅中國運動品牌，絲絲日後睇英超球賽，就會見到伯明翰球員穿上「特步-伯明翰」（Xtep-BCFC）聯合標誌嘅品牌。
5年贊助斥資逾億
特步贊助伯明翰為期5年，贊助費9,000萬元，另仲有1,000萬元嘅運動裝費，若球隊贏英超聯或打入足總盃等決賽，就再畀80萬至500萬元獎金。另外，伯明翰球員會參加「特步-伯明翰」品牌活動，喺伯明翰球場豎立特步廣告牌，當然日後特步店舖亦會出售印有「特步-伯明翰」嘅產品。特步主席丁水波話，好高興與伯明翰合作，對「特步-伯明翰」嘅產品喺內地銷售前景充滿信心。
絲絲聽朋友話，特步打敗唔少內地運動品牌先爭贏贊助伯明翰，而近期呢支球隊亦愈戰愈勇，剛創下14場不敗紀錄。絲絲好開心日後睇英超，會見到外國球隊穿上中國人嘅自家品牌。
余絲韻