本文重點
正所謂十年河東、十年河西，眼見亞洲區經濟咁旺，西方老字號錢莊亦紛紛向東方進發。「大笨象」滙控（00005）將行政總裁辦公室搬嚟香港，而喺金融海嘯中重創嘅花旗銀行就邀請咗大摩前亞洲區主席文禮信（Alasdair Morrison）加盟，仲為佢度身訂造咗個新職位——亞洲區高級顧問，佢亦會加入花旗嘅資深策略顧問小組。
「中國通」開正佢嗰瓣
呢排好多「賓卡」因為巨額花紅搞到好頭痕，不過今次花旗請到文禮信出山就意義非凡，皆因呢位高級顧問嘅經驗真係有錢都買唔到。佢除咗係大摩前亞洲區主席外，仲係怡和前大班，喺怡和做咗28年咁耐。佢喺○七年離開大摩後靜咗好耐，今次出山重投投行之前，佢就身兼商交所非執行董事。
有中環老友話，文禮信嘅人脈關係好，相信有助花旗嘅業務。咁又係呀，文禮信喺香港及大陸工作咗30幾年，可謂「中國通」，不過佢喺○七年，當時58歲嘅佢就毅然離開大摩，當時有江湖傳聞話，係因為佢對未來有其他規劃，例如佢希望可跑遍五大洲，喺參加咗佢太太嗰間戶外探險公司組織嘅超長馬拉松比賽後，佢又想挑戰戈壁灘，所以佢希望做啲清閒啲嘅虛職，以計劃其他發展。
余絲韻