內地開始收緊銀根，港股連續五日插水，期間唔見咗成千三點，差唔多跌番落去「杜彈」時嘅低位，而同期港匯又弱過藥煲，成個熱錢流走格局咁，不過啲股仔唔理大市有幾頭暈，自己就愈炒愈精神，所以大家都唔太感受到今次跌市嘅威力。
過去一年內地樓價升到你唔信，中央就覺得係水浸樓市嘅結果，於是要求收緊樓按，令內房股出現一次小調整，但業績將至，在盈利大增下，內房股始終有一定吸引力，中國奧園（03883）傳內地嘅別墅項目銷售強勁，市場普遍預估今年將有重大收益入帳，盤數自然可以睇高一線。事實上，奧園股價十二月中突然由1.6元狂插水跌落1.3元後，一直都係橫向收集，即使近期內房股受壓，但奧園股價仍能穩守1.3元水平，估計沽盤過後，隨時會炒番轉業績，如果成功收復50日線嘅1.42元，可以上試1.8元，止蝕可定於1.25元。
古晨