絲絲尋日收到一封標題為「Thank you and Goodbye」嘅電郵，即刻Click去睇吓邊個新一年咁快要同絲絲講拜拜，原來係瑞信前股票衍生工具銷售及市場推廣副總裁朱紅（Niki）話尋日係最後一日返工，專登道別與多謝絲絲過去嘅支持。

絲絲當然打畀Niki關心一下，佢話做窩輪呢一行「變幻原是永恒」，係自己向公司請辭，仲話唔係突然間決定，都算係經年累月嘅考慮，但由於合約嘅關係，唔可以同絲絲透露日後嘅去向。其實本地窩輪及牛熊證個「Pie」咁大，競爭自然激烈，跳槽、轉工、挖角等事件真係十常八九，相信絲絲好快又會收到佢嘅最新消息。

余絲韻