雖然港股前日開出黑盤，但尋日即以大成交急升近500點，走勢完全改變晒。尋日升市，各類股份升勢全面，尤其係啲股仔，相信農曆新年前，港股仲可以繼續狂炒。
內地去年成功「保八」，但今年在出口未見樂觀下，如何催谷內需以幫補出口嘅不足，成為中央首要任務，所以十二月中央率先推出政策刺激旅遊業，元旦過後，海南島成為首個受惠地區，相信未來陸續會有其他政策出台，相關板塊真係要
到實。
航空股去年飽受摧殘，古晨仲記得隻東航（00670）如果唔係得老媽子注資，隨時過唔到關，偉大嘅祖國現時咁強大，阿爺又點會睇住自己啲航空企業就此玩完呢？不過搞東航風險性幾高，相反有盈利又有國內外航線撐場嘅國航（00753）就穩陣得多，呢轉隨時可以見8元水平，近期20日線支持幾強，一於以5.88元作為止蝕位。
古晨