本文重點
○九年樓市暢旺，唔止大型地產代理行大豐收，連中小型代理行成績都相當理想。世紀21富山地產行政總裁柯興捷話，舊年公司除二手物業買賣唔錯之外，由於九龍區有多個新盤開售，令一手物業買賣嘅佣金都大增，舊年四月份業績更創開業以嚟的十四年新高，而清水灣道８號分行更創百萬佣金佳績，由於全賴一眾同事創佳績，所以決定按同事表現，喺春節前發放一百萬元花紅畀前線同後勤員工。
他又話，公司主攻黃大仙、新蒲崗及鑽石山一帶，由於啟德新區發展同郵輪碼頭已落實動工，相信未來業績可受惠市況同步上升，所以今個月中總部搬去一個更大的辦公室，以便擴大招聘同培訓人才基地，為未來發展作好準備。
陸東測市 股樓齊旺
另一邊廂，美聯集團（01200）昨日搞咗今年首個主管月會，主題係「承先啟後，再起風雲」，Vincent知道今次仲邀請到重量級股票分析師陸東擔任嘉賓，分享對經濟及樓市嘅睇法，佢預測今年恒指可以升到26,500點水平，股市向好，加上內地經濟又持續做好，就會有更多內地客來港置業，自然利好本地樓市。
至於美聯集團主席黃建業都話睇好今年樓市表現，因為香港有背靠祖國嘅優勢，睇嚟佢兩個對內地經濟前景都幾有信心，可以帶旺今年香港樓市。
（Vincent Lau）