大市反彈，不過力度有限，成交進一步縮水至459.6億元，詩詩預咗愈玩愈縮，尋日清倉離場。咁啱一沽清中信資源（01205），尋日竟玩拉閘停牌，唔通之前詩詩收風有注資嚟料，真係時也命也。
早前宣布轉型的天然乳品（00462），昨急升17.5%，高收1.81元。公司自宣布以5億紐元收購新西蘭產銷牲畜及乳製品業務的UBNZ Assets Holdings，雖然收購價似乎畀得好貴，但股價照升可也，已累升逾倍。
呢間公司一直玩變身，早於○七年底，以1.3億元購入青島永鑫匯全部權益，轉型從事壓碎及揀選磁鐵礦石，由福茂易名為中國金匯礦業。不過，轉型後業績未見改善，今年五月再度出手，變身一條龍式的企業，由經營、生產、銷售到分銷乳脂固體及乳製品等，將錄得純利逾億元。
天然乳品立即變身做配套完備的消費股，股價剛在起步階段，但要留意公司個別交易帳目仍有欠妥善披露，買此股有一定風險，投資者量力而為。
詩詩