韓克強落場冇生疏

咪以為Andy做慣高層，唔記得銀紙點數，查實佢手勢依然非常純熟。當日其實係滙豐與少年警訊合作宣傳禁毒及反罪案訊息，帶咗四十幾個中學生去滙豐屯門分行，並介紹銀行運作。

當日銀行職員親身示範數銀紙方法，睇到成班學生嘩嘩聲，而且仲同Andy比賽。學生除學識數錢之外，警方仲同學生講解點樣分辨偽鈔，同佢哋一齊檢查銀紙嘅防偽特徵。

除咗Andy親自落場之外，滙豐亦派出一位高級財富管理經理分享工作及生活經驗，有學生聽完就話覺得銀行嘅前線工作充滿挑戰及樂趣，仲話明要努力讀書，畢業後喺銀行界搵份好工。

余絲韻