本文重點
香港董事學會尋日搞咗個周年晚宴暨○九年度傑出董事獎頒獎典禮，其中一家獲獎公司中糧控股（00606）嘅主席寧高寧全場笑笑口，佢同絲絲話好開心佢哋得獎之餘，公司股價仲喺尋日創咗新高，佢又賣花讚花香話全靠公司獨立董事夠晒專業，以及公司嚴格遵守自身管理系統，先至可以管理得咁好喎。
劉廷安「天書」立不敗
同場仲有中國人壽（海外）副董事長兼總裁劉廷安，佢喺去年金融海嘯前夕上任，一上台就採取多項措施，力保公司喺「海嘯」中立於不敗之地，當中以理順公司規章制度、總字數多逾100萬字嘅《基礎管理制度》最令絲絲印象深刻。劉總講笑話，有咗呢套「天書」，自己開間壽險公司都無問題喎。
攞到傑出董事獎嘅共有8人，除咗寧高寧及劉廷安外，其他獲獎嘅包括中移（00941）董事長王建宙、中旅（00308）執行董事總經理許慕韓、中國建築（03311）副主席周勇、中國建築集團董事局、思捷（00330）副主席鄭明訓及香港耆康老人福利會主席麥建華。
余絲韻