本文重點
尋日係證券業協會成立30周年，剛上任證券業協會主席嘅大福證券（00665）副行政總裁李耀榮，自然被大家圍住追問佢有關海通證券收購大福證券嘅事，大家最關心係大福嘅員工可否留低，李耀榮就大派定心丸，話據佢了解，所有員工及現有管理層會維持不變。至於大福證券會唔會改名，佢就話唔知道。
絲絲就比較關心「錢」，海通全購會否加價呢？佢就話依家全購程序仲進行緊，買賣雙方已訂協議，唔會提價，即按原價每股4.88元全購。
講番證券業協會，除咗30歲生日外，絲絲聽聞仲有一項突破性發展，話說該會與台灣有關證券業嘅組織將簽署合作諒解備忘錄，標誌着港、台未來嘅金融合作及交流有更深層次。聽講協會未來仲希望與內地有關方面簽署合作備忘錄。其實有金融界老友早就話，未來半年港、台嘅金融交流將有突破性發展，絲絲真係要拭目以待。
證券業協會賀壽熱鬧
尋日酒會有逾百名嘉賓，其中包括立法會議員詹培忠，有「金勞詹」就唔會有冷場，佢自爆話酒會後仲有下場，因為有「股壇校長」之稱嘅李福兆返咗嚟香港，要同佢撐枱腳喎。港交所（00388）現任和候任行政總裁周文耀及李小加就前後腳到場，連久未露面嘅老行尊朱頌田都畀面前來敍舊。
余絲韻