黃奕鑑獲委首席顧問

早喺今年六月，米高（黃之洋名）宣布明年一月一日起轉任非執行董事，不過新地失去呢位「橋王」兼老臣子實在係一大損失，佢哋尋日就宣布畀個「集團首席顧問」嘅名銜予米高，明年一月一日為集團長遠業務發展及重大決策提供意見。

米高大學畢業後就加入新地，由行政見習生做起，由於「數口精」兼「多橋」，所以有「數王」及「橋王」之稱。新地副主席兼董事總經理郭炳聯尋日就畀呢位老臣子極高評價：「黃奕鑑服務新地28年，對公司貢獻殊深，成功推展公司業務穩步向前，而黃氏日後能以集團首席顧問身份，繼續為新地的長遠發展提供寶貴意見，定能為集團的未來發展帶來裨益。」

轉幕後兼享退休生活

現時米高嘅日常工作已順利交接予首席財務總監陳國威。新地發言人話，米高將以顧問角色繼續効力新地，同時又可展開退休生活，投放更多時間追求個人興趣及參與社會公益服務，足見新地對呢位「橋王」仍十分重視，而早前有關米高退休嘅各種揣測，相信亦已不攻自破！

余絲韻