大市升得好好哋，又突然傳來內銀股可能要提升資本充足比率嘅壞消息，市場即時腳仔軟，其實禮拜一呢個消息已經遭有關部門否認過，不過市場卻認為係借勢測試市場反應，上證指數尋日因此而插水。雖然尋日港股午市開市都跌得幾急，不過啲股仔反應都幾正面，睇怕暫時都係有調整無大死格局。
炒股仔炒到接近水尾，一眾位列仙班嘅仙股，自然又蠢蠢欲動。今年市場一眾水務股大熱，隻國中控股（00202）年中借旗下附屬黑龍江國中水務輾轉炒上，一度擺脫仙班之列，曾炒過上0.135元。可惜其後大市回吐，股價又落番0.08元收集，近期國中再借出售國中水務而炒上，喺0.1元邊做晒旗形咁，尋日似想突破，成交又似樣，計一計今轉要挑戰番0.135元應無難度，水尾炒仙股合晒邏輯，止蝕位一於定於0.09元。
古晨