最近幾個人力資源機構都話，嚟緊呢年好多機構都會有人工加，香港最大僱主之一嘅滙豐銀行，其薪酬調整動向一直好受市場注目。
鄭海泉：睇個別表現
絲絲尋日就將呢個焦點問題拋畀滙豐亞太區主席鄭海泉，鄭大班話出年加唔加人工要等董事會決定，依家仲未知，不過佢強調幾年前開始已無咗集體劃一加薪呢支歌仔唱，加唔加人工都係睇個別員工表現，不過佢都補充一句，話好員工就一直都有加薪！
恒隆地產（00101）主席陳啟宗尋日就話，集團資金充裕，幾個月前推售「君臨天下」，盈利達50幾億元，令集團依家有淨現金喺手。
陳啟宗大派定心丸
佢向員工大派定心丸，承諾會同佢哋分享豐碩成果，至於加幾多人工就要睇定啲先算。
雖然陳啟宗無明確話加唔加人工，不過大家可以放心，陳生嘅寶號對員工都唔錯，因為佢喺海嘯期間都無肥上瘦下，佢講明就算減薪都只限管理層，又承諾唔裁員，表現優秀嘅員工喺今年初更獲花紅。絲絲綜合咗兩位老闆嘅說法，深明要獲加薪就要努力工作，大家真係要做好呢份工喇！
余絲韻