紮營喺香港嘅中國人壽（海外），今年歡度25歲生日，佢哋前日喺香港文化中心贊助咗一場音樂盛宴，絲絲好鍾意聽音樂會，梗要去感受吓。
曾自爆唔識講要返歸
音樂會開場前，絲絲就畀國壽（海外）副董事長兼總裁劉廷安嚇咗一跳，因為佢致詞時竟然全程用廣東話，而且講得唔錯。佢果然不負董事長楊超對佢嘅期望，咁快就融入咗香港社會，相信楊董都唔會咁快調佢返內地。
絲絲點解咁講？因為劉總曾經自爆話，楊超去年派佢嚟香港時，曾講笑咁「警告」佢，如果半年之內都唔識講廣東話，就要調佢返內地。
融入香港 取得佳績
呢段日子以來，絲絲見劉總好畀心機融入香港，依家成績有目共睹。第一張成績表係業務快速增長，佢哋今年上半年保費增長咗三成，新單保費收入嘅增幅更打入前三甲，相信投資方面嘅成績更加好啦！
第二張成績表係成功重塑國壽喺香港嘅形象，以前本港市民淨喺識得2628（國壽上市編號），唔炒股嘅人就唔多知道，原來國壽喺香港都有保險賣。
經過劉總一番重整後，依家姚明代言嘅廣告牌已經通街都見到，楊董知道咗，仲唔笑到見牙唔見眼？
余絲韻