本文重點
中區優質商廈寸金尺土眾所周知，Vincent八到，同國際金融中心2期步程少於五分鐘的亞洲大廈，中層一個面積近900方呎的全層剛截標，聽講有投資者出價每方呎逾1萬元成功奪標，做價除創該廈30多年來新高紀錄外，亦是過去幾年來區內同類乙級商廈做價新高。有口痕友話，新買家斥資約900萬元左右，就可以喺中區擁有一層與世界頂尖級商廈為鄰的商廈，都算物有所值。
聽代理老友講，上述亞洲大廈中層全層，面積約893方呎，實用率大約五成。雖然地方細，但位置優越；銀主兩周前叫代理搵客競投，有興趣人士不乏投資者，惟終獲買家出價每方呎逾1萬元，打動銀主割愛。
利嘉閣連派3季花紅
今年首三季樓市暢旺，令各代理行普遍豬籠入水，利嘉閣廖偉強同Vincent講，公司決定發放第三季花紅畀後勤員工，估計會在十一月中旬發放最少逾1個月薪金，最多會超過2個月，今次亦係連續3個季度發放花紅，累計發放花紅最高達逾4.5個月薪金；同系中原亦計劃發放花紅，該公司話，由於發放金額未定，所以遲少少先公布，但就強調一定唔會少過姊妹公司。至於美聯就話，今年九月時已向後勤員工加薪，平均加幅約一成。
（Vincent Lau）