女生束髮 男禁戴耳環

原來佢哋實施咗新做法，話係一切由心出發嘅客戶體驗模式，目的係希望全港二百幾間分行都有一致嘅優質服務。成套標準服務模式非常細緻，例如規定女同事只可佩戴一對耳環、男同事就唔准戴；女同事長頭髮要紮起，與客人對話時要有眼神接觸等。總之無論係儀容、衣着、談吐都要講求專業形象。

喺未開始呢個全新服務模式前，分行同事要做足培訓，仲有書仔、貓紙卡提供畀員工，等佢哋容易記住啲規條。

安排神秘人測試服務

為確保服務質素，中銀更安排咗神秘人測試同事嘅服務水平。絲絲有一日去佢哋嘅分行，行埋去櫃位做個好簡單嘅銀行服務，嗰Teller就問我貴姓，等我仲以為有乜唔妥，做完服務後，佢就講聲「多謝！希望下次可以再為你服務」，絲絲仲以為自己「升呢」做咗大客戶。

難道中銀因為喺雷曼事件中形象受損，所以依家要重新建立喺客戶心目中嘅形象？如果係嘅話，就梗係要從前線着手喇，事關前線員工係直接面對客戶，佢哋嘅一舉一動都影響客戶對中銀嘅印象。

余絲韻