本文重點
絲絲聽人講，話賽馬運動與英國社交界關係密切，融合咗奢華及體育嘅精髓。利邦（00891）董事總經理王日明對此非常認同，佢話公司旗下品牌Kent & Curwen係英國經典品牌，與賽馬運動非常脗合，所以Kent & Curwen決定連續3年贊助賽馬，仲會推出一系列有賽事徽章嘅外套及Polo恤服飾。
推出賽事徽章服飾
利邦今次與香港賽馬會合作，將連續3年贊助「Kent & Curwen百週年紀念短途盃」，首屆賽事喺明年一月三十一日舉行，賽事獎金有成450萬元。最特別係推出一系列有賽事徽章嘅服飾配合賽事，喺Kent & Curwen各大門店有售。
利邦下周會喺聯交所掛牌，Kent & Curwen係佢哋其中一個品牌，聽講呢個品牌大有來頭，因為設計以皇家生活為藍本，喺英國已有80年歷史，早前專門為高級私人會所、俱樂部、牛津及劍橋大學，做設計及生產領呔，七十年代發展板球服及欖球服，更成為英國國家板球隊制服供應商。
余絲韻