本文重點
華潤集團董事長宋林原來係該集團唯一由低層做起嘅董事長，而唔係由其他部委調任，宋董都好感慨咁話，其實佢一畢業就入咗華潤，幾乎個個部門都做齊，好彩遇到華潤集團前副董事長，即係依家嘅中糧集團董事長寧高寧呢位「伯樂」，亦成為喺職場生涯中對佢影響最大嘅人之一。唔怪得宋董行事作風與寧總有啲似喇，好似喺華潤業務重組、分拆公司上市方面，都與寧總有一脈相承之勢添。
宋董同絲絲傾傾吓突然又嘆咗口氣，原來自從佢做咗華潤董事長後，成日要周圍去為業務奔波，好似今個月又要成個月唔喺香港，所以都好耐無同寧總呢位老朋友見面。
忙到好耐無見家人
絲絲都知宋總真係好忙，同佢傾一陣偈，電話響聲未停過，咁老婆仔女有無投訴？佢話都好耐無見屋企人，不過老婆好明白男人以事業為重，依家宋太喺美國陪個女讀書。睇嚟紅籌老總真係唔易做，淨係唔可以成日同屋企人喺埋一齊呢樣，都唔係咁多人可以接受到啦。
余絲韻