本文重點
滙豐控股（00005）主席葛霖嘅著作《Good Value》早排入選《金融時報》及高盛嘅年度最佳財經書籍候選名單，絲絲一直都好期待佢可以攞獎，結果終於出咗，葛霖最後輸咗個馬鼻，今年得獎嘅係基金公司Rock Creek Group顧問艾哈邁德（Liaquat Ahamed）著作《金融之王》（Lords of Finance），贏得3萬英鎊（約38.7萬港元）獎金。
葛霖係唯一一個獲授聖公會牧師資格嘅國際銀行主席，《Good Value》係佢第二本出嘅書，距離第一本已經13年，兩本書同樣論及作為基督徒嘅佢如何看金融市場。
追溯經濟大蕭條肇因
講番得獎者艾哈邁德嘅《金融之王》，內容主要追溯一度被譽為「全球最高級集團」嘅四大央行之崛起與失誤，其中包括法國央行嘅莫羅、德國央行嘅貨幣專員沙赫特、英倫銀行以及紐約聯儲銀行嘅諾爾曼和斯特朗，書中指上述四人擁有龐大權力，喺第一次世界大戰後着手修復全球金融體系，但最終弄巧反拙，反而令金融系統癱瘓，到諾爾曼承認佢哋四個人一事無成之時，為時已晚，引發大蕭條。艾哈邁德話，當時唯一判斷正確嘅只有著名經濟學家凱恩斯。
他又寫道，經濟大蕭條並非上帝嘅「傑作」，亦非資本主義矛盾嘅結果，而是一眾經濟決策者及財金官員一連串錯判及集體犯錯嘅直接產物。
余絲韻