曾言「包底」帶挈員工

瑞銀成日幫內房股上市，蔡洪平話內地八成嘅大型地產商上市都係由佢經手，好似綠城（03900）、恒盛（00845）以及快將上市嘅龍湖。依佢嘅觀察，九成內地買家都係自住，而且土地係稀缺資源，所以個市仲喺合理水平。

蔡洪平睇好房產唔係得把口講，而係身體力行。三年前喺深圳中國房地產大會上，佢就鼓勵所有員工拿到錢就買靚樓，仲話會「包底」：「誰輸了我貼，到我貼光為止。」結果人人都賺，蔡生唔使貼錢。

不過，房地產好似唔係受到祝福嘅行業，好似十大振興政策咁，就冇房地產嘅份兒。蔡洪平話房地產好似中國經濟入面嘅一個「逆子」，喺一個大家族入面不嬲都唔受歡迎，不過佢亦往往係拯救家族嘅人。佢話房產投資一元，對經濟嘅帶動力係二點八，何解？皆因美國人搬屋，除咗換老婆，其他照舊；但係中國人搬屋，除咗老婆，乜都換晒！

余絲韻