本文重點
港交所（00388）候任行政總裁李小加本月中履新後，尋日首次見傳媒，大家最關心交易所行政總裁嘅交接工作係咪順利，佢就大派定心丸，話上任一個多星期，交接有序咁進行，佢亦已經同港交所各大部門主管開會，了解各部門嘅運作，認識亦逐步加深。佢相信喺周文耀及各同事支持下，有信心未來數月做好交接嘅工作。
Gel靚個頭「初會」傳媒
李小加原本喺上個禮拜一在港返工首日出嚟見傳媒，由於當日有事，加上剛從美國出差返嚟，於是改期到尋日至見傳媒。尋日朝早9點半佢就準時出現，絲絲覺得佢整個人好似精神咗好多，細看之下，原來佢尋日特別Gel咗個頭，怪唔得令人耳目一新啦！
佢話由於自己明年一月十六日至正式上任行政總裁，喺呢個時間之前，佢唔準備接受太多嘅採訪，港交所嘅運作事宜應該先問番周文耀。而到正式上任後，佢至會向大家交代港交所嘅未來發展及策略。
雖然佢尋日冇接受記者嘅提問，由出現到講完嘢，前後最多不過5分鐘，實在非常「快閃」，但大家對呢位港交所首名來自內地嘅候任行政總裁，興趣仍然好大，唔放過採訪佢嘅機會。
余絲韻