代理同Vincent講，上述新港城凶宅盤係屋苑嘅「則王」，望海景，同類單位做價約370萬元，即係今次做價比正常單位嘅市價低咗30%。忠誠拍賣行鄭世傑話，除新港城外，之前幾次拍賣都賣唔出嘅西貢蠔涌新村凶宅銀主盤，面積1,394方呎，尋日都賣咗250萬元，呎價1,793元，高開價25%。

工廈研討會火速爆滿

受惠施政報告提出活化工廈，唔少舊式工廈即刻鹹魚翻生，就連唔少搵開住宅盤嘅客都話感興趣，好似美聯工商舖（00459）今日搞嘅工廈物業前景研討會，原本諗住只安排50個名額，點知半日內收到嘅報名登記已超過120個，由於市場反應踴躍，為免一眾有興趣人士失望而回，所以決定加場。

據了解，上述研討會列席講者除咗美聯工商部掌舵人陳偉志之外，仲會邀請到測量師，以及一班業主到場互相交換心得，聽講有幾位十多年無炒工廈嘅資深投資者都話會到場收風，八吓現時市場最新情況。

（Vincent Lau）